Tausiga lelei ma asiasiga

Tausiga lelei

O tulaga e moomia mo le tausiga lelei o fale e board ai e tutusa lea ma faatulagana o mautotogi masani.

E tatau i tagata e ona fale e board ai ona faamautinoa o i se tulaga lelei mea na faaleleia. O lona uiga ia mautinoa o saogalemu ma lelei i le nofo. E tatau foi i tagata e ona fale ona faamautinoa mea o le fale e pei o le umukuka ma le faletaele, o i se tulaga mamā ma lelei. Afai e lē o faatinoa e le tagata e ona le fale tulaga nei e ono noatia i se sala tupe.

O le matafaioi a tagata o nofo mautotogi le teu faamamā ma faamanaia potu o nonofo ai.

Saili atili i le faamatalaina o le tausiga lelei o meatotino.

Afai e iai se mea ua faaleagaina o fale e board ai, po o moomia le toe faaleleia, o mea nei e tatau i tagata nofo mautotogi ona faailoa i le tagata e ona le fale i se taimi vave e mafai ai.

Saili atili i le faamatalaina o mea e faaleleia ma mea ua faaleagaina.

Asiasiga

Afai e te ona se fale, e lelei lou toaga e asiasi e vaai tulaga o iai fale e board ai. E fesoasoani asiasiga e te iloa ai o lo o aogā ma lelei mea uma, e leai se mea o leaga, ma o vaai lelei e tagata nofo mautotogi mea o le fale.

• E tatau i tagata e ona fale ona tuuina atu se faaaliga e lē itiiti ifo ma le 24 itula mo se asiasiga o le potu o fia fai.
• O le maualuga faatapulaaina e mafai ai ona faia asiasiga mo se potu e faatasi i vaiaso ta‘i fa ma faia asiasiga.
• E tatau ona faia asiasiga mai le 8am i le 6pm mo fale e board ai, se‘i vagana ua iai se maliega a le tagata nofo mautotogi ma lē ona le fale i se isi taimi i fafo atu ma itula nei.
• E mafai i le tagata e ona le fale ona toe faia se asiasiga o le potu pe afai na malie i ai le tagata nofo mautotogi faatasi ai ma le tagata e ona le fale ona sa iai mea na toe faaleleia pe faamamā i le aso na faatulagaina ai. E tatau pea i le tagata e ona le fale ona sa‘o le umi na tuuina atu ai se faaaliga (24 itula).
• E mafai e le tagata e ona le fale ona ulufale i le fale e board ai (e lē o potu taitasi) i soo se taimi. Peitai, e lē mafai e le tagata e ona le fale, po o se tasi o tagata nofo mautotogi, ona aiā fua i le nofo lelei o se isi.

O isi mafuaaga mo le ulufale i totonu o le potu o se tagata nofo mautotogi

O isi mafuaaga e ese mai asiasiga, e ono mafai ai e le tagata e ona le fale ona ulufale i le potu o se fale e board ai pe a tuanai le 24 itula talu ona tuuina atu se faaaliga e:

• asiasi ai le potu, pe afai e talitonu le tagata e ona le fale ua faainaelo le tagata nofo mautotogi i le potu, po o le solia o le Residential Tenancies Act 1986 (le Tulafono) i se isi auala
• e fia faasino le potu i se tasi o fia nofo mautotogi ai po o fia faatauina
• e fia faataunuu ana aiaiga o noatia ai i lalo o le Tulafono
• e fia faia se asiasiga o se galuega na faatonu e lē ona le fale le tagata mautotogi e tatau ona faataunuu, po o se galuega sa malie i ai le tagata mautotogi na te faia
• e fia faasino le potu i se tagata faamauina e fuaina le tau o se meatotino, o sui tau esetete, o se tagata e asiasi fale, o se tagata o fia faatauina pe nofo ai, po o se tagata o fia nofo mautotogi ai.

E ono ulufale le tagata e ona le fale i se potu o se fale e board ai e aunoa ma se faaaliga:

• pe afai na malie i ai le tagata nofo mautotogi, pe na vave ioe i ai i le taimi lava, o le a ulufale atu ai
• pe afai e talitonu le tagata e ona le fale ua lamatia le soifua o se tasi po o le faaleagaina o le meatotino ma ua talafeagai ona ulufale e tuuitiitia pe aveese mea e lamatia ai
• e tuuina atu soo se auaunaga na malilie i ai, ma e tatau ona ausia aiaiga o le maliega po o tulafono o le fale
• ma e tusa ai ma se poloaiga mai le Tenancy Tribunal.

Lokaina ma le malupuipuia

• E tatau ona malupuipuia lelei le fale ma potu uma.
• E tatau i le tagata e ona le fale ona saunia loka e faamautinoa ai le tulaga lea.
• e tatau ona mafai e tagata mautotogi ona faaaogā potu, faleese ma faletaele i taimi uma.
• A o lei suia soo se loka, e tatau i le tagata e ona le fale ona faailoa i tagata nofo mautotogi taitasi o le a aafia ai i le tulaga lea.
• E lē mafai i tagata nofo mautotogi ona suia, faapipii pe aveese soo se loka po o se mea tai tutusa e malupuipuia ai le fale.

Faailo asu

O fale mautotogi uma e faamalosia le tatau ona iai ni faailo asu po o faailo o lo o ola lelei. O faailo asu fou e tatau ona mafai ona vave iloa se afi a o lei oo ina matuā sasao ma ia umi le taimi e ola ai le maa, pe faapipii i uaea eletise o le fale.

E tatau ona faapipii faailo asu:

• i totonu o le 3 mita mai le faitotoa o le potumoe, po o potu uma o lo o faaaogā e momoe ai
• i fogafale taitasi o le fale pe afai e tele fogafale
• i totonu o ituaiga fale mautotogi uma, o kalaveni mautotogi, ma sleep-outs.

E tatau i tagata e ona le fale ona faamautinoa o ola lelei faailo asu i le amataga mai o se mautotogi fou taitasi ma faatumauina ai pea le ola lelei i le vaitaimi atoa o le mautotogi.

E lē mafai e tagata nofo mautotogi ona faaleaga, aveese pe tapē se faailo asu. E tatau ona ia suia maa ua pē (pe afai o ituaiga faailo asu tuai e faaola i maa e mafai ona sui), ma e afai o iai ni faaletonu i faailo asu e tatau ona latou faailoa tulaga nei i le tagata e ona le fale i se taimi vave e mafai ai.

Saili atili i le faamatalaina o tulaga e moomia mo faailo asu

Gaioiga e fai pe afai ua iai ni faafitauli

O le solia o se aiaiga e faasino i se tulaga ua lē usitaia ai e se tasi (se tagata nofo mautotogi po o se tagata e ona le fale) tulafono o le Residential Tenancies Act.

A solia e se tagata nofo mautotogi po o se tasi e ona le fale le Residential Tenancies Act, e tāua le malamalama i mea e mafai ona e faatino e toe faasa‘o ai.

Afai e iai se feeseeseaiga ma le tagata e ona le fale po o le tagata nofo mautotogi, taumafai e foia i le va o oulua lava. E iai auala matou te fautuaina e faatino ai tulaga nei.

Afai o iai se maliega i auala e tali atu ai i se faafitauli, ia mautinoa o se maliega tusia ma sainia i le va o (le) tagata nofo mautotogi ma le tagata e ona le fale.

E iai taimi e lē mafai ai ona maua se maliega autasi i le auala e mafai ona tali atu ai i se faafitauli. Afai o se tulaga lea ua maua ai e ono talafeagai le tuuina atu o se ‘faaaliga e togafitia ai.’ O le faaaliga lenei e faailoa atu ai i le isi tagata lana mea na fai ua solia ai le maliega, o mea e moomia ona ia faatinoa e toe faaleleia ai ma le taimi ua tuuina atu e faataunuu ai. Afai e lei faaleleia tulaga na mafaufauina i le taimi na tuuina atu e faatino ai e mafai ona e tuuina atu se talosaga i le Tenancy Tribunal mo se tali. E ono tau auala atu i se faaleleiga po o se tolaulauga i luma o le faamasinoga.

Saili atili i le faamatalaina o tulaga ua solia ma le faaaliga e togafitia ai.

Saili atili i le faiga e tuuina atu ai se talosaga i le Tenancy Tribunal.