Ko e tuʻutuʻuni pau ia ke ʻaofi fakamāfana ʻa e ʻaofi ʻató mo e lalo falikí ʻi he ngaahi ʻapi nofo totongi kotoa pē ʻi he ʻene aʻu ki he ʻaho 1 Siulai 2019.

Ko e kau lenilooti ʻe ʻikai ke nau faipau ki he ngaahi tuʻutuʻuní te nau fakahoko ai ha maumau lao pea ʻe ala tautea kinautolu ʻo aʻu hake ki he $4,000.

Ko e hā ʻa e meʻa ʻoku fiemaʻu ke fakahoko ʻe he kau lenilooti?

1. Vakaiʻi pe ʻe lava ke fokotuʻu ha ʻaofi fakamāfana

ʻOku ʻi ai ha ngaahi fakaʻatā makehe ki he fiemaʻu ko ʻení ki ha ngaahi faʻahinga fale ʻe niʻihi.

Hangē ko ʻení, ko e ngaahi ʻapi ko ʻení ʻoku mātuʻaki faingataʻa hanau ʻaofi fakamāfana, pe ʻe fiemaʻu ha fuʻu ngāue fakalelei lahi ke fakahokoʻaki ʻeni.

Founga ki hono vakaiʻi pe ʻoku kau ho ʻapí ʻi he fakaʻatā makehé

2. Vakaiʻi ʻa e tūkuknga lolotonga ʻo hoʻo ʻaofi fakamāfaná

Te ke lava ʻo vakaiʻi ʻa e tūkunga ʻo hoʻo ʻaofi fakamāfaná ʻaki ʻa hoʻo:

  • Sio tonu ki he vahaʻa ʻo e ʻató mo e ʻaofí pea mo e lalo falé
  • Totongi ha tokotaha polofesinale ke ne vakaiʻi ʻeni
  • Vakaiʻi ʻa e faile ʻa e kōsilió

Kapau ʻokú ke totongi ha tokotaha polofesinale, ʻe lava ke ke maʻu ʻa e hingoa ʻo e ngaahi kautaha ʻaofi fakamāfaná ʻi he ʻinitanetí.

ʻOku totonu ke ke fuofua maʻu atu ha fakamahuʻinga kehekehe ʻe tolu pe lahi ange kimuʻa peá ke toki fili ha kautaha mei ai.

Fakamatala lahi ange ki hono vakaiʻi ʻo e ʻaofi fakamāfaná [PDF, 2.5 MB]

Vakaiʻi mo hono fokotuʻu ʻo e ʻaofi fakamāfaná ʻi ha founga malu mo hao

3. Fokotuʻu pe fakalahi ʻa e ʻaofi fakamāfaná kapau ʻoku fiemaʻu

Kuo pau ke fokotuʻu ʻe he kau lenilootí ʻa e ʻaofi fakamāfana ʻi he ʻaofi ʻo e ʻató pea mo e lalo falikí, ʻi he feituʻu ʻoku ala lava ai ʻení. Kuo pau ke faipau ʻa e ngāué ni ki he ngaahi tuʻutuʻuní pea ke fokotuʻu ʻi ha founga malu mo hao. ʻOku ʻikai tuʻupau ke fokotuʻu ha ʻaofi fakamāfana ia ki he holisí.

Fakakakato ʻo e ngaahi fiemaʻu tuʻupau ki he ʻaofi fakamāfaná

Ko e fakamolé ʻe makatuʻunga pē ia ʻi he lahi, fuo mo e feituʻu ʻoku tuʻu ai ʻa ho ʻapí.

Ki ha fakafuofua fakaofiofi, ko hono fakaʻavalisi ʻo e fakamole ki ha tokotaha fokotuʻu ʻaofi polofesinale ke ne fokotuʻu ha ʻaofi fakamāfana ki he ʻaofí mo e lalo falikí ko e $3,400 nai teʻeki tānaki ki ai ʻa e GST ki ha ʻapi ko hono lahí ko e sikuea mita ʻe 96. ʻOku totonu ke ke ʻamanaki atu ke totongi ha mahuʻinga māʻolunga ange ki ha ʻapi lahi ange.

ʻOku lava ke fokotuʻu ʻa e ʻaofi fakamāfaná ʻi he lahi ʻo e ngaahi ʻapí, ʻi ha ʻaho pē ʻe taha.

ʻE makatuʻunga pē ʻa e taimi tatali ki hono vakaiʻi ʻo e tūkunga ʻo e ʻaofi fakamāfaná, pea mo e fokotuʻu taimi ke fakahoko ai ʻa e ngāué meí he feituʻu ʻokú ke ʻi ai ʻi Nuʻu Silá, pea mo e lahi ʻo hono fiemaʻua ʻo e ngāué ni.

Koeʻuhí ʻoku ngata ʻeni meí he ʻaho 1 Siulai 2019, ʻe ala vave ʻa hono taʻofi (book) ʻo e kau ngāue fokotuʻu ʻaofi fakamāfaná.

Ki ha fakamatala lahi ange, kau ai mo e ngaahi lisi ʻo e kau fokotuʻu ʻaofi kuo ʻosi maʻu tikité, vakai ki he:

The Insulation Association of New Zealand (external link)

The Energy Efficiency Conservation Authority (external link)

4. Fakapapauʻi ʻoku kau ha fakamatala ʻaofi fakamāfana ʻi hoʻo aleapau nofo totongí

Ko e ngaahi aleapau nofo totongi kotoa pē kuo pau ke fakakau ki ai ha fakamatala ʻaofi fakamāfana kehe kuo ʻosi fakamoʻoni hingoa ki ai (signed) ʻa ia ʻoku hā ʻi ai ʻa e ʻaofi fakamāfana ʻoku ʻi he ʻapí, feituʻu ʻoku ʻai aí, mo e faʻahinga ʻo e ʻaofi fakamāfaná.

Ngāueʻaki ʻa ʻemau foomu (template) ki he fakamatala ʻaofi fakamāfaná ke fakapapauʻi ʻokú ke fakakakato ʻa e ngaahi fakamatala ʻoku fiemaʻu ʻi he malumalu ʻo e Residential Tenancies Act (Lao ki he Nofo Totongi ʻi he Ngaahi ʻApi Tāutahá).

Kapau te ke ngāueʻaki ʻa e ʻemau foomu aleapau nofo totongí, ʻoku ʻosi fakakau ʻi ai ʻa e foomu fakamatala ʻaofi fakamāfaná.

Insulation statement template [PDF, 103 KB]

Tenancy agreement template [PDF, 337 KB]

ʻE fēfē kapau ʻe ʻikai fakakakato ʻe he kau lenilootí ʻa e ngaahi tuʻutuʻuni ki he ʻaofi fakamāfana?

Tukukehe kapau kuo ʻi ai ha fakaʻatā makehe, ko e kau lenilooti kuo teʻeki ai ke nau fokotuʻu ʻa e ʻaofi fakamāfana ʻoku fiemaʻú ʻi honau ngaahi ʻapi nofo totongí ʻi he ʻene aʻu ki Siulai 2019, kuo nau maumauʻi ʻa e Residential Tenancies Act.

ʻE lava ke nau totongi ha tautea paʻanga ʻe ala aʻu hake ki he $4,000, ʻa ia ʻoku faʻa totongi ʻeni ki he tokotaha nofo totongí.

Ko e kau lenilooti ʻoku tokolahi ange ʻa ʻenau kau nofo totongí te nau ala hanga atu ki ha ngaahi tautea kehekehe ki he ʻapi takitaha ʻoku ʻikai ke ne fakakakato ʻa e tuʻutuʻuní.

ʻE kei fiemaʻu pē ke nau fokotuʻu ʻa e ngaahi ʻaofi fakamāfana totonu ʻoku fiemaʻu ʻe he tuʻutuʻuní.

Ko ha kau lenilooti ʻoku teʻeki ai ke nau fakakakato ʻa e tuʻutuʻuní hili haʻanau totongi ha paʻanga tautea, ʻe lava ke toe hoko atu hono tautea kinautolú.

Fakakakato ʻo e ngaahi fiemaʻu tuʻupau ki he ʻaofi fakamāfaná

Ko e hā ʻa e ngaahi lelei ʻo e ʻaofi fakamāfana?

ʻOku tauhi ʻe he ngaahi ʻaofi fakamāfaná ho ʻapi nofo totongí ke māfana pea mōmoa, ʻo faingofua pea lelei ange ai ke fakamāfanaʻi (heat) ia ʻe he kau nofo totongí.

ʻOku tokoni ʻa e ngaahi ʻapi māfana mo mōmoá ki he kau nofo totongí ke nau hao ai mei haʻanau puke pea ʻe ala hoko ai haʻanau nofo taimi lōloa ange.

Ko e tōʻonga fakapisinisi lelei foki ʻeni ke maluʻiʻaki ʻa hoʻo paʻanga ʻinivesí, ʻaki ʻa hoʻo tauhi ʻa ho ʻapí ke ʻi ha tūkunga lelei.